Le 27 décembre 1520 en la cour du roy notre sire à Angers (Nicolas Huot notaire Angers) personnellement estably Lucas Coué demourant en la paroisse de saint Germain en sainct Lau lez Angers ainsi qu’il dit etc soubzmectant etc confesse avoir aujourd’huy vendu et octroié et encores vend et octroie dès maintenant et à présent à tousjoursmais perpétuellement par héritage
à Jehan Nau de ladite paroisse de St Germain qui a achacté pour luy et Thienote sa femme leurs hoirs et aians cause
le tiers d’une planche de vigne contenant ung quarteron et plus assis ou cloux d’Espinant en la paroisse de Ste Jame sur Loire joignant toute icelle planche d’un cousté à la vigne de Jehan Boucheron et d’autre cousté à la vigne de Pierre Mauczais aboutant d’un bout aux vignes du secretain de l’Esvière et d’autre bout aux terres de Guillaume Richard ou fyé du seigneur de la Quarte lez Angers et tenue toute ladite planche de luy à 15 deniers tz de cens rente ou debvoir paiables par chacun an au jour de l’Angevyne et ce pour tous debvoirs et charges quelconques fors la dixme
transportant etc et est faite ceste présente vendition pour le prix et somme de 6 livres tournois de laquelle somme ledit achacteur et a paié et baillé audit vendeur de paravant ce jour la somme de 4 livres tz ainsi que ledit vendeur a cogneu et confessé par davant nous estre vray et les avoir eu et receu dudit achacteur en deux escuz d’or au merc du soulleil bons et de poids dont ledit vendeur s’en est tenu par davant nous à bien paié et content et en a quicté et quicte ledit achacteur, et le surplus de ladite somme qui est 40 sols tz ledit achacteur a promis doibt et sera tenu les paier et bailler audit vendeur toutefois et quant il plaira audit vendeur ce que ledit achacteur a promis faire
et a promis ledit vendeur faire lyer et obliger Jehanne sa femme à ce présent contrat et iceluy luy faire avoir agréable et en rendre et bailler à ses despens lettre vallable de ratiffication audit achacteur dedans ung an prochainement venant à la peine de 40 sols tz de peine commise à appliquer audit achacteur en cas de deffault ces présentes néantmoings demeurant en leur force et vertu
o grâce et faculté donnée par ledit achacteur audit vendeur ou aians sa cause de rescourcer rémérer et avoir lesdites choses vendues du joud’huy dedans ung an prochainement venant en reffondant et paiant par ledit vendeur audit achaceur ou aians sa cause ladite somme de 6 livres tz avecques les loyaulx cousts et mises
à laquelle vendition et tout ce que dessus est dit tenir et accomplir d’une part et d’autre etc et à garantir etc et aux dommages etc oblige lesdites parties l’une vers l’autre chacun en tant et pour tant que luy touche eulx leurs hoirs etc renonçant ledit vendeur à toutes et chacunes les choses etc foy jugement et condemnation etc
présents ad ce Guillaume Herault de ladite paroisse de St Lau et Jehan Huot clerc lesné demourant à Angers tesmoings
fait à Angers en la rue St Jehan Baptiste les jour et an susdits
et a esté dépensé en vin de marché à faire et célébrer ces présentes du consentement desdites parties la somme de 2 sols 6 deniers tz
Odile Halbert – Reproduction interdite sur autre endroit d’Internet Merci d’en discuter sur ce blog.