Le 30 octobre 1521 (Nicolas Huot notaire Angers) en notre cour du pallais d\u2019Angers etc personnellement estably honnorable homme et sage maistre Jehan Ledevin licenci\u00e9 en loix sieur de Villettes et de Fontaine Bouillant d\u2019une part, et Mac\u00e9 Couppe paroissien de St Georges le Gaultier au cont\u00e9 du Maine d\u2019autre part, soubzmectant confessent avoir ce jourd\u2019huy fait entre eux les march\u00e9s pactions et conventions de baill\u00e9e et prinse \u00e0 ferme telz et en la mani\u00e8re qui s\u2019ensuit, c\u2019est \u00e0 savoir que ledit Ledevin a baill\u00e9 et baille \u00e0 tiltre de terme et non autrement audit Coupp\u00e9 qui a prins et accept\u00e9 dudit Ledevin audit tiltre de ferme et non autrement du jour et feste de Toussaint prochainement venant jusques \u00e0 6 ann\u00e9es et 6 cueillettes enti\u00e8res et parfaites ensuivant l\u2019une l\u2019autre sans intervalle de temps ledit lieu fy\u00e9 domaine seigneurie et appartenances de Fontaine Bouillant sis en la paroisse de St Paoul le Gaultier audit pays du Maine, tout ainsi que ledit lieu se poursuit et comporte avecques toutes et chacunes ses appartenances et d\u00e9pendances tant en fief que en domaine et tout ainsi que ledit Ledevin ses pr\u00e9d\u00e9cesseurs fermiers et autres de par eulx l\u2019ont tenu poss\u00e9d\u00e9 et exploit\u00e9 sans aucune chose en retenir excepter ne r\u00e9server, pour en iceluy lieu demourer et converser honnestement par ledit Coupp\u00e9 ainsi que honneste et bon p\u00e8re de famille soit tenu faire et pour en prendre lever cueillir et amasser tous et chacuns les fruits profits revenus et \u00e9molumens qui proviendront audit lieu fy\u00e9 et seigneurie de Fontaine Bouillant et en faire et disposer par ledit preneur toute sa plaine (f\u00b02) valeur comme de sa propre chose\u00a0; et est faite ceste pr\u00e9sente baill\u00e9e prinse et acceptation de ferme pour en rendre et paier par chacune desdites 6 ann\u00e9es et 6 cueillettes par ledit preneur ses hoirs audit bailleur \u00e0 ses hoirs etc en ceste ville d\u2019Angers en la maison dudit bailleur et aux couts et mises dudit preneur la somme de 45 livres tz au jour et feste de Toussaints le premier paiement commen\u00e7ant au jour et feste de Toussaints que nous dirons 1523\u00a0; et sera tenu en outre ledit preneur acquiter ledit lieu des devoirs cens rentes et autres redevances deuz pour raison dudit lieu aux seigneurs o\u00f9 il est tenu et subject qui est la somme de 40 sols tz deuz par chacun an au seigneur d\u2019Averton et en acquiter ledit bailleur\u00a0; et sera tenu en outre ledit preneur tenir et entretenir les maisons et appartenances dudit lieu en bonne et suffisante r\u00e9paration en mani\u00e8re qu\u2019elles ne puissent d\u00e9p\u00e9rir et les y rendre en la fin de ladite ferme\u00a0; et a r\u00e9serv\u00e9 et reserve ledit bailleur la moiti\u00e9 des ventes et autres \u00e9molumens de fy\u00e9 qui pourront advenir audit fy\u00e9 ladite ferme durant\u00a0; et ne pourra ledit preneur faire ne composer d\u2019aucunes ventes sans le cong\u00e9 et licence dudit bailleur\u00a0; et est dit et accord\u00e9 entre lesdites parties que ledit preneur prendra les rentes et devoirs sans deniers audit fy\u00e9 de Fontaine Bouillant \u00e0 ceste feste de Toussaints prochainement venant\u00a0; et pour ce qui touche le bestial estant sur ledit lieu appartenant audit bailleur qu\u2019il dit monter \u00e0 la somme de 43 livres 10 sols tz, ledit preneur sera tenu poyer audit bailleur ladite somme de 48 livres 10 sols au moyen de ce que du jourd\u2019huy ledit bailleur a transport\u00e9 et transporte ledit bestial estant en iceluy lieu vallant ladite somme de 48 livres 10 sols (f\u00b03) lequel bestial estant entre les mains de Jehan Tharot pr\u00e9c\u00e9dent fermier dudit lieu, lequel Tharot avoit autrefois promis et se seroit oblig\u00e9 de payer audit bailleur ladite somme de 48 livres 10 sols pour ledit bestial ou bailler de bestial \u00e0 raison d\u2019icelle somme sur ledit lieu de Fontaine Bouillant\u00a0; et aussi a promis ledit Coupp\u00e9 rendre \u00e0 la fin de ceste ferme ledit lieu ensemenc\u00e9 et les guerets faits ainsi qu\u2019ils le sont de pr\u00e9sent\u00a0; et sera tenu en outre ledit preneur bailler par chacun an ladite ferme durant audit bailleur \u00e0 ses hoirs etc en ceste ville d\u2019Angers en la maison dudit bailleur le nombre de 13 livres de beurre net et ferme avecques 2 bons chappons\u00a0; et a est\u00e9 ad ce pr\u00e9sent Guillaume Deschamps paroissien de ladite paroisse de Saint Georges le Gaultier ainsi qu\u2019il dit lequel \u00e0 pleini et cautionn\u00e9 et par ces pr\u00e9sents plenist et cautionne ledit fermier de tout le contenu en ceste pr\u00e9sente ferme et en a fait et fait son propre fait et debte et s\u2019en est constitu\u00e9 et constitu\u00e9 principal paieur et d\u00e9biteur pour ledit Coupp\u00e9 fermier susdit\u00a0; auxquelles choses dessusdites tenir et accomplis etc et ladite ferme rendre et paier etc et ladite ferme garantir etc et aux dommages dudit bailleur de ses hoirs etc amendes etc obligent lesdites parties l\u2019une vers l\u2019autre etc et les biens dudit preneur \u00e0 prendre vendre etc renon\u00e7ant etc foy jugement et condemnation etc pr\u00e9sents ad ce honnorables hommes et sages maistres Pierre de Blavou bachelier en loix, et noble homme maistre Ren\u00e9 Deseguisson bachelier en decret demourant \u00e0 Angers tesmoings<\/p>\n